Zec 14 | HUI | STEP | Anduane Homogonaga horo mbira tagira ibulebira. Horo ogoni tagira ibirangi Yarusaleme wali agali tínaga muni mbirale ngamiruni waitigime ibalu mo yulebira. Mo yuwa tíni handaya ho kamiore dege tíninaga deni howa talebu yagayaga bulebira.

a 14.4Ese 47.1-10, Mai 1.3-4, Hab 3.6, Seg 4.7, 14.8

b 14.7Ais 60.19, Md 24.36, Mo 21.23, 22.5

c 14.8Ese 47.1, Yol 3.18, Yo 7.38, Mo 22.1

d 14.9Ais 2.2-4, 45.21-24, Seg 9.9, 14.16-17

e 14.11Mo 22.3

f 14.16LBM 23.39-43

g 14.20Har 28.36-38, Ais 23.18, Ese 46.20

h 14.21Ese 44.9, Seb 1.11, Seg 9.8

Zechariah 14

Waitigirume Yarusalemeni wai bulebira lenego ogo

1 Anduane Homogonaga horo mbira tagira ibulebira. Horo ogoni tagira ibirangi Yarusaleme wali agali tínaga muni mbirale ngamiruni waitigime ibalu mo yulebira. Mo yuwa tíni handaya ho kamiore dege tíninaga deni howa talebu yagayaga bulebira. 2 Anduane Homogohanda dindi bibahendeha howa hameigini tara tara haru ibalu ti Yarusaleme baba wai bulebira. Tigua Yarusaleme bope howa tí andagaha mbirale ngamiru bibahende mo yai halu wali bedaru minade halu kayu yaga bialu holebira. Wali agali karu bibahende halu ki mo tale buwa wabuni mbirago garabaya haru pialu wabuni mendego Yarusalemeni helo waholebira. 3 Ani biragola Anduane Homogo ibugua ala wai birangi biaga wiyadagua dindi bibahendeha howa ibiyaru uruni baba wai bulebira. 4 Horo uruni tagira ibirangi Anduane Homogo ibuni Yarusaleme tano kaware ni tagira ibiragohayagi Hari Olibe nene ngagoria holebira. Ani kagola Hari Olibe kago hanuni kambuluki howa amura haga haga biragola dindi ulini panda panda ona wu yu polebira. Hari hanuni kambuluki haragola mendego uyurayagi ha uyu halu mendego unurayagi ha unu holebira. ^a 5 Ani kagola dindi tigabi panda panda hanuni wupe kagoria tí ogonidagua pialu ibida yo pialu poleberemi. Bamba Yuda dindiha Kini Usia heangi dindi dumbirumbi biyagola tínaga mamaliru ibida penedagua áyu dindi ulini panda panda ogoni wu yu pialu dindi mini Asala mbira ngagoria tagira pedago tí ogonidagua puabo holeberemi. Ani poramigola horo ogoningi Anduane Homogo i̱naga Ngode Datagaliwabe kagome ibunaga dahuliyaliru haru hai halu ibulebira.

6 Ani bialu horo uruni ibiragola dagare bulenebi kewaro ibira holenebi nawulebira. 7 Alendohayagi aruma naholebira. Anidagua biragola horombe mbiragada lolene nawi wá haabo holebira. Mbirale uruni tagira ibulene ogoangilo Anduane Homogo ibuni hangu manda bu ka. ^b

8 Horo ogoningi iba gagahe bayaleore Yarusalemeha howa dugualu pialu holebira. Iba gene kira pu tale bialu gene mende iba kuyama mini Iba Homene bedagoha pupe halu mendego pialu solowara timbuni Medidereniana bedagoha pu mogo bulebira. Iba ogonime hundia nabi dalungibi gaea timbuni birangibi duguaho wialu pialu haabo holebira. ^c 9 Ani bialu Anduane Homogo ibugua dindi bibahendenaga handameho haga kini holebira. Wali agali bibahendeoreme ibu Anduane Homogoore ka lowa ibunaga mini mbiraore hangu lalu ibu hanguhondo mitangi bialu lotu lalu holebira. ^d

10 Yarusalemeni dindi ngago dondole tigabiore Yarusalemenaga tano abene uyurayagi Geba tano ngagoria howa wu yu pialu unurayagi Limono tano ngagoria tagira polebira. Yarusaleme tano ibu dege hari hombeneni wiaabo holebira. Yarusaleme tanonaga pabe dege ala pene wiyago wiaabo holebira. Tanonaga pabe panga mini Beniyamininaga Panga laga ngagoria howa pialu pabe panga mini Paulaga kagoria panga ala dugu wini ngagoria tagira polebira. Amuna pabe neneni mamage haga agalinaga anda daliga bini mini Hananelenaga laga kagoria howa pialu kininagawaini iba wabiagagerebi lini pingidaga ege to̱le̱ uli ngagoria tagira polebira. 11 Ani pedagola Yarusaleme wali agali tiha mo ko holene mbira nawi howa ti gi nahe bayale haabo holebira. ^e

12 Dindi bibahendeni hameigini tara tara karu Yarusaleme wali agali baba wai biaga bu karuha Anduane Homogohanda warago ko taraore ibilolebira. Warago ko ogonime ogodagua bulebira. Wali agali tini heyu kaore tinaga de hégeru tingini bibahende togo biai holebira.

13 Anidagua bialu Anduane Homogohanda wali agali uruni mo luluya holebira. Ani mo luluya ho heledagola tini dege dege mandagi karu minu yania halu bo wahaga bulebira. 14 Ani birangi Yudali bu karume Yarusaleme wali agali bolilono mo wialu wai bulebira. Ani bialu tigua hameigini dindi tara tara ngaruha wali agali bu karunaga muni ngolo silibabi aga bayale ngarubi mo yai holebira.

15 Waitiginaga balai anda bu kagoria nogo hosiru kameleru dongiru bibahende yani timbuni biame halu homai holebira.

Dindi bibahendeha hameigini tara tara karume Anduane Homogo mitangi bialu lotu lolebira lenego ogo

16 Yudali tinaga waitigi bu karu bo wahai kagola mani yu wahene emene karu tigua mali bibahendeni Yarusaleme ibaabo halu holebira. Anduane Homogo Hongo Haiheore kago ibuni tinaga kini ka lowa tigua ibuhondo mitangi bialu lotu lalu holebira. Ani howa tigua AndaNemandaha Palu Holene Horo tagira ibirangi bulene mana wini ngadagua talialu bialu holebira. ^f 17 Ani bialu hameigini tara tara marume dindi mbiraha howa Anduane Homogo Hongo Haiheore kago ibu inanaga kini kago mitangi bialu lotu lole naibaga heagua tinaga dindiha iba dalu naibulebira. 18 Anigo Iyibi wali agalirume Anda Nemandaha Palu Holene Horo tagira ibirangi bulene mana wini ngadagua Anduane Homogo mitangi bialu lotu lole naibiyagua dindi maru ngaruha wali agali lotu lole naibaga bu hearuha mo ko helonaga ibugua warago ko ibilagadagua Iyibi wali agali tihabi nde ani ibilolebira. 19 Tigua Anduane Homogo mitangi bialu lotu ogoni labe manga hayagua Iyibi wali agalibi hameigini tara tara dindi bibahendeha bu karubi bibahendeore pani tandaga mbiraore ogoni ale dege nai holebira.

20 Ani birangi tinaga nogo hosi mani mbelo emene mbira pongobia ho ngaruni bi ogo gilibu wulebira. Ogo Anduane Homogonaga loma bia ho nga, lalu gilibu wulebira. Anduane Homogonaga andaha todobene be bu ngarubi dunini dege wialu ibuninagaore ndisi be loma bininaga nogo darama hambu wiaga timbuni lomabu delaga dabuni ngaligobi dege wulebira. ^g 21 Ani bialu Yarusalemeha Yuda dindi bibahendehabi todobene be damene ti andagaha ngaru bibahendeore Anduane Homogo Hongo Haiheore kago ibunaga lomabu wiai holebira. Mani howa wali agalime tinaga nogo sibi bulumagaru bo lomabu miragola nogo mbiriniru todobene be tininaga ndo Anduane Homogonaga loma bia hene uruniha dawalebira. Horo ogoningi howa mbiralime mbirale yolo bilo Anduane Homogonaga andaha yalu polene nawulebira, lalu Anduane Homogohanda Segaraiaha howa bi ogoni mbiwia halu latagi hene. ^h